Според календарот на МПЦ (Јулијанскиот календар) денеска е 31 јули. Денеска е Св. праведен Евдоким. Свети Евдоким се роди во Кападокија во деветтиот век, во времето на византискиот цар Теофил. Кога порасна стапи во војничка служба како офицер. Но, Евдоким не се препушти на бурниот и бучен војнички живот, туку и како војник строго ги пазеше Христовите заповеди. Заради неговите големи добродетели уште како млад беше поставен за војвода на Кападокија. Се упокои на свои 33 години. Подоцна се покажа дека неговите мошти се беа сочувале цели, без никакви знаци на трулење и испуштаа добар мирис и многумина кои се допираа до нив добиваа исцелување од различни болести. Подоцна моштите му беа пренесени во Цариград. Според Католичкиот календар денеска е Св. Понцијан и Хиполит. Свети Понцијан бил папа кој управувал со црквата во третиот век за време на прогонствата на црквата кои ги спроведувал римскиот цар Максим Трачанин. Царот го прогонил свети Понцијан на островот Сардинија кој бил наречен остров на смртта. Таму тој умрел заедно со свештеникот Хиполит. На овие двајца светци, верниците им се молат за истрајност во верата.

Денеска е 31 јули (стар стил) и се слават повеќе светци. Свети Евдоким е роден во Кападокија од благочестиви родители, Василиј и Евдокија. Во времето на царот Теофил (829 г. – 842 г.) Евдоким беше млад офицер во војската. Но и како војник вложуваше секаков напор за да живее според евангелските заповеди. Непорочно ја чуваше својата чистота и одбегнуваше да зборува со која и да е жена освен со мајка му; беше милосрден кон бедните, грижлив во читањето свештени книги и уште погрижлив во молитвите кон Бога. Одбегнуваше суетни забави и празнословие. „Сред метежот и суетата на светот, како крин меѓу трње и како злато насред оган“. Заради неговите необични добродетели царот го постави за војвода кападокиски. На таа висока положба Евдоким се грижеше да биде праведен пред Бога и кон луѓето. Но по Божја Промисла се упокои рано, во својата триесет и трета година. Неговите мошти се пројавија како целебни. Еден полуден човек се допре до неговиот гроб и оздраве, а и едно фатено дете се крена и стана здраво. По осумнаесет месеци неговата мајка го отвори ковчегот и го најде неговото тело како живо, без каков било знак на распаѓање. А од телото на светителот излегуваше прекрасен мирис. Подоцна моштите му ги пренесоа во Цариград и ги погребаа во новата црква на Пресвета Богородица, усторена од благочестивите родителите на овој праведен Евдоким. Благообразниот Јосиф, богат човек, член на еврејскиот Синедрион и потаен следбеник Христов (Матеј 27, 57; Јован 19, 38). Го симна Христовото тело од крстот и заедно со Никодим го положи во својата гробница. За ова беше окован од Евреите и фрлен во затвор. Но, таму му се јави воскреснатиот Господ и го увери во Своето воскресение. Потоа Евреите го пуштија од затворот и го протераа од татковината. Тој тргна да го проповеда Христовото Евангелие по светот, а таа вест ја донесе и во Англија, каде се упокои во Господа. Света Јулита е од Кесарија Кападокиска. Со соседот имаше спор околу имотот, па тој појде на суд и обвини Јулита дека е христијанка, што во тоа време значеше да биде фрлена надвор од законска заштита. Светата Јулита попрво се откажа од имотот одошто од верата. Но, злобните незнабожци не ја оставија мирна ниту после ова, туку ја фатија и ја мачеа и најпосле ја изгореа во оган, во 303 година. Оваа следбеничка на Христа ги даде имотот и телото за да си ја спаси душата за вечноста. Свештеномаченик Венијамин, митрополит Петроградски и Гдовски, и со него убиените свештеномаченик архим. Сергиј и маченици Јуриј и Јован (1922).

Денеска е 30 јули (по стар стил) и се слават Светите апостоли Сила, Силуан, Крискент, Епенет и Андроник. Сите се од седумдесетмината апостоли. Свети Сила беше испратен од Ерусалим во Антиохија со Павле и Варнава да го решат спорот меѓу верните околу обрезанието, односно дека не треба да се обрезуваат незнабожците кои преминуваат во христијанство (ДАп. 15, 22). По ова, Сила патуваше со Павле по Азија и Македонија и беше поставен за епископ во Коринт, каде мирно се упокои. Силуан им помагаше на двајцата врховни апостоли (1Пт. 5, 12; 2Кор. 1, 19). Како епископ во Солун се потруди многу и многу претрпе додека не го замени земниот живот со небесниот. Крискент му беше сотрудник на Светиот апостол Павле (2Тим. 4, 10), а потоа епископ во Галија, каде маченички пострада за Христа во времето на Трајан. Свети Епенет, кого го спомнува Светиот апостол Павле (Рим. 16, 5), беше епископ во Картагена. Андроник (Рим. 16, 7), епископ Панонски, се спомнува одделно, на 17 мај.