Холивудската ѕвезда Џенифер Анистон (51) му помогнала на својот пријател, телевизискиот водител Џими Кимел, во остварувањето на големото изненадување за медицинска сестра заразена со вирусот ковид-19 поради што две недели се наоѓа во строга изолација од семејството и двете мали деца. Актерката се вклучила во шоуто на Кимел преку видеоповик за да ја поздрави Кимбел Фербанкс, медицинска сестра од Јута, и јавно ѝ се заблагодарила, како и на сите други медицински сестри, за храброста и несебичноста да ги подредат своите животи на пациентите на штета на своето семејство.

– Само сакам да кажам – Бог да те благослови тебе и сите оние што го правите ова. Не знам со кои зборови да ја изразам својата благодарноста за сè што правите ставајќи го во опасност сопственото здравје.

Неверојатни сте – рекла Џенифер Анистон. Џенифер Анистон, која веќе три недели е во изолација од претпазливост во својот дом, на Кимбол Фербанкс ѝ дала подарок-картичка, со износ од 10.000 долари, а изненадувањето е уште поголемо што такви подарок-картички ќе добијат сите медицински сестри што работат со неа на одделот.

Мајката на две деца започнала да чувствува симптоми пред неколку дена , а потоа била хоспитализирана. – Се чувствував како да ме удрил воз. Но, мислам дека имам навистина благи симптоми. Чувствувам како да имам настинка во комбинација со грип – рекла таа.

Медицинската сестра објаснила дека сега е во карантин и дека не може да биде во близина на нејзиното семејство, нејзините две ќерки – едната има четири години, а помалата 18 месеци.