Францускиот сликар Беноист, како војник од 1914 до 1918-та, насликал серија мотиви од Тиквеш до Солун

Францускиот сликар Амабл Беноист (Amable BENOIST) се родил во Париз на 24 фебруари 1886 година. Татко му, Еуген Гарди (Eugène GARDY) бил познат париски декоратор. Во тоа време немало тапети или колор принтери. Декораторите ги украсувале ѕидовите во куќите на богаташите или пак театарските сцени со рачно цртање. Најдобрите од нив имале академско ликовно образование.

Уште како мал, Амабл почнал да зема часови по цртање од татко му, а се школувал подоцна на париската ликовна академија. Во 1913-та година добива работа како декоратор во театарот Капитол во Тулуз, каде што ја сретнува младата учителка по германски јазик Хенриета Трапe (Henriette TRAPÉ) во која се вљубува и се венчава на 25 јули 1914 година.

Амабл и Хенриета немале време за меден мецес. Само три дена по нивната свадба започнала Првата Светска Војна. Како и сите млади Французи понесени со младешки патриотизам и слепа храброст, Амабл се пријавува како доброволец на француската војска. После помината обука, на почетокот на 1915 година Амабл е испратен во Македонија и бил стациониран во Кавадарци.

Во 1915 година, српската војска е потисната од запад и од север од Австроунгарците , а од исток од Бугарите. Французите, кои биле сојузници на Србите, пратиле војска во Македонија да ги одбие овие напади и да ја зачува Вардарска Македонија во рамките на Србија. Но Бугарската војска била несопирлива, Во нивни раце паѓал град по град: Скопје, Велес, Гратско, Прилеп… Тогаш Француската војска решила да се повлече од Кавадарци, и преку Криволак, Миравци, Гевгелија да оди кон Солун.

Амабл направил илустрации од сите овие македонски места. Во следните години, пратен е од Солун кон Серес, а пото а и учествивал во битката на Добро Поле на 15 септември 1918, во која Србите и Французите ги пробиле линиите на Германците и Бугарите и по која всушност силите на Центарот ја губат Првата Светска Војна.

После војната, Амабл се враќа во Тулуз, каде што работи како декоратер во театарот Капитол.

Во јуни 1940 година, силите на Хитлер ја пробиваат се леснотија француската „непробојна“ Мажино линија, и ја освојуваат Франција.

Триумфалната Порта во Париз била направена за низ неа да помине големиот француски војсководец Наполеон Бонапарт. Но Наполеон умрел пред Портата да биде завршена, а на 14 Јуни 1940 година низ Портата поминува еден друг војсководец – Адолф Хитлер.

Advertisement

Амабл Беноист повторно со голем патриотизам се вклучува во Отпорот, каде што дизајнира и печати плакати кои повикувале на бунт и отпор кон нацистите. Но неговата сопруга Хенриета работела како преведувачка од германски на француски јазик. Амабл не можел да ѝ прости што работи со нацистите и на 17-ти Септември 1940 година се разведува од неа.

После војната, Амабл се сели во Париз, каде што ја запознава својата втора сопруга – модната дизајнерка Марта Клавери (Marthe CLAVERIE) со која живее заедно сѐ до негова смрт во на 21 мај 1976 година. Во негова чест градот Тулуз крстува една улица ( Rue Amable Benoist) која до денес го носи негоивото име.

Сите македонски цртежи, Амабл ги ставил во еден албум, во кој исто така нацртал карта каде и кога се движел низ Македонија за време на Големата војна. Во 2015-та година, овој албум преку аукција е продаден на еден британски дилер на слики, кој за жал ги испосекол секој цртежи од албумот и ги продал овие цртежи скоро сите на грчки и француски колекционери. За среќа од него ги добив барем фотогратиите од овие цртежи кои сега ги споделувам со Вас.