Сосема неочекувано минатата зима Барселона го купи Франсиско Тринкао од Брага за 31.000.000 евра. Уште тогаш за еден од најталентираните португалски фудбалери се лепеа прекари како „новиот Роналдо“, „новиот Фиго“ или едноставно наследник на Лионел Меси. Преголеми очекувања за момче кое се уште треба да се докажува на големата сцена.

Но, постојат индиции дека 20-годишниот Тринкао можеби нема да добие шанса да покаже зошто Барса за него плати 31.000.000 евра! Имено, уште во понеделникот наутро каталонски „Спорт“ лансираше вест дека Барселона одбила 60.000.000 евра од неименуван клуб од Премиер лигата. Секако, новинарите започнаа да „копаат“ и успеаја да го извлечат името на Лестер.

Со тоа што Фабрицио Романо, човекот кој откри дека станува збор за „Лисиците“, има нешто поинакви информации од оние од Каталонија. Имено, тој тврди дека Лестер до Барселона ја испратил следнава понуда – позајмица до следното лето, со задолжителен откуп од 50.000.000 евра. Делува доста ризично, но Лестер очигледно гледа потенцијал во Тринкао.

Меѓу Барселона и Лестер и понатаму нема договор, со тоа што клубовите интензивно преговараат околу формулата на трансферот. Интересно е дека Барселона се впушта во преговори, иако не треба да се заборави дека Тринкао е доведен на самиот почеток на мандатот на Кике Сетиен на кого му се тресе клупата по загубената шампионска трка со Реал и слабите игри од враќањето на фудбалот на големата сцена.

Она што е исто така важно, во трка за потписот на Тринкао е и Аталанта. „Божицата од провинцијата“ ја заврши сезоната од соништата во која обезбеди ново учество во ЛШ, а уште треба да го одигра и четвртфиналето од годинешното издание против ПСЖ.

Во Бергамо се решени поради Тринкао на момент да заборават на вообичаениот рецепт „купувај евтино – продавај скапо“, па подготвуваат идентична понуда до Барселона. Тринкао во изминатата сезона за Брага одигра 40 натпревари и собра девет погодоци и 13 асистенции. Има договор со Барселона до јуни 2025 и сега е прашање дали тој воопшто ќе биде активен.