Врие од полиција пред влезот за Старата скопска чаршија. Кај црквата „св. Спас“ се собрани и роднини и пријатели на убиените, но и на лицата вработени во угостителскиот објект каде се случи крвавото убиство. Екипа на „Макфакс“ од терен јавува дека самото присуство на голем број полициски службеници прави дополнителна тензија.
Единицата за брзо распоредување на МВР е со панцири, полициски штитови, пушки. Со оглед дека станува за настан кој водеќи се од првичните информации се класифицира како организирано двојно убиство, нивото на претпазливост е на највиско ниво.
- Спонзор -
Роднините и пријателите, пак, трагаат по дополнителни информаци, додека полицијата трага по дополнителни докази кои ќе ги откријат сторителите.
Официјалните информации од МВР потврдуваат дека еден од убиените е наркобос кој се поврзува со Грчец, Јетон Кривањева викан Жила. Другиот, неофицијално, е неговиот возач и телохранител. Од Обвинителството само дополнија дека се земаат траги од лице место.
„Макфакс“ објави неофицијални детали за тоа како се случувало планираното убиство. Вооружената група составена од околу пет лица, била облечена во униформи, кажала дека ќе се прави полициска рација и рекла никој да не мрда. Убиените седеле во одделна просторија, каде биле убиени.
Убијците од Чаршија избегале со „ауди“, кое е запалено на излезот кон скопската обиколница.
