СВЕТИ МАЧЕНИК ТРИФУН

Роден е во селото Кампсада во Фригија од сиромашни родители. Во детството беше чувар на гуски. И уште од детството врз него беше голема Божја благодат и можеше да исцелува болести кај луѓето и кај животните и да изгонува бесови.

Во тоа време со Римското царство завладеа царот Гордијан, чија ќерка слезе од умот и со тоа го фрли царот во голема жалост. Ниту еден лекар не можеше да ѝ помогне на лудата Гордијана. Тогаш демонот прозборе преку девојката ѝ рече дека освен Трифун никој не може да го истера. По многумина Трифуни ширум царството, по Божја Промисла го повикаа и овој млад и вистински Трифун. Го доведоа во Рим и тој ја исцели царската ќерка. Царот му подари многубројни дарови, а тој на враќање им ги раздели на сиромасите.
Потоа ова свето момче продолжи да чува гуски и да Му се моли на Бога.

Кога се зацари христоборниот Декиј, Свети Трифун беше малтретиран и свирепо измачуван заради Христа. Но, тој со голема радост ги поднесе сите мачења, велејќи: „О кога би можел да се удостојам во оган и маки да завршам за името на Исус Христос, мојот Бог и Господ!“.
Маките не му наштетија ни малку и најпосле мачителите го осудија на смрт со меч.
Му се помоли на Бога и издивна во 250 година.

По молитвите на Светиот Христов маченик Трифун, Бог да ја спаси и помилува мојата мајка, целиот македонски род и нашата татковина Македонија!