Трофејот во Лигата Европа во ниеден момент не беше меѓу целите на Барселона за оваа сезона и во екипата владее одлично расположение и покрај синоќешниот пораз од Манчестер Јунајтед, тврдат шпанските медиуми.
„Каталонците“ ќе се спасат од напорниот распоред во финишот од сезоната и ќе имаат време да се одморат за големите напори во обидот да ја освојат шампионската титула во Ла Лига, а можеби и трофејот од Копа дел Реј. Веќе идната недела претстои првиот полуфинален натпревар против Реал, а до крајот на сезоната остануваат уште 16 кола во кои треба да се задржи предноста од осум бода во однос на најголемиот ривал.
Единствениот проблем од елиминацијата од Јунајтед е финансискиот дел. Барселона останува без можност да се бори за 14 милиони евра кои би ѝ припаднале за евентуално освојување на титулата, а кои добро би ѝ дошле во оваа финансиска криза.
- Спонзор -
Освен тоа, каталонскиот клуб мора да му исплати и бонус на Баерн, во висина од 1,25 милиони евра затоа што е исполнета клаузулата од договорот за трансфер на Левандовски за 25 постигнати голови. Полјакот синоќа стигна до оваа бројка со реализираниот пенал на Олд Трафорд.
