Министерот е оптимист: Серија А наскоро се враќа

Министерот за спорт на Италија Винченцо Спадафора потврди дека научниот одбор на владата им одобри на клубовите екипни тренинзи од понеделник 25 мај и изјави дека е оптимист кога станува збор за продолжување на натпреварувањето во фудбалското првенство.

Се чини дека владата, фудбалската федерација и Серија А конечно се договорија на кој начин фудбалот ќе се врати, откако оригиналниот здравствен протокол е променет. Натпреварувањето во Серија А е прекинато пред повеќе од два месеци поради пандемијата на коронавирусот.

„Им помагавме на соработниците и спортските работници. Сите добија плати за март и ќе добијат плати за април и мај автоматски. Сфаќам дека момците сакаат повторно да играат по два и пол месеци. Во текот на тој период покажаа одговорност, но потребно е да се биде внимателен“, изјави денеска Спадафора за радио „Раи“.

„Го објавивме протоколот кој им дозволува на екипите да продолжат со тренинзите. Научно-техничкиот одбор даде зелено светло“, додаде тој.

Според тој протоколо, се укинува претходното барање целата екипа да се стави во карантин во случај на позитивен тест на коронавирус, па во изолација ќе одат само заразените.

Спадафора истакна дека на 28 мај ќе биде донесена одлуката за оваа сезона.

„Од Фудбалската федерација на 25 мај ќе го добијам протоколот за продолжување на натпреварувањето. Ќе го проследам до Научно-техничкиот одбор, со цел да бидеме сигурни дека 28 мај е вистинското време за одлука дали сезоната ќе биде продолжена. Сакам да бидам оптимист. Одлучно им реков „не“ на оние кои, кога секојдневно броевме стотици мртви, ме прашуваа за фудбалската сезона“, изјави тој.

„Очигледно е дека ако цела Италија повторно се покрене, дека тоа мора да го направи и фудбалот. Тоа е индустрија и страст на сите Италијанци“, додаде Спадафора.

Related Articles

Leave a Reply

Your email address will not be published. Required fields are marked *