Вести
„Македонски екстра квалитет“ и „традиционален македонски квалитет“ нови марки за популаризирање на домашното производство
Македонските производи добиваат посебен идентитет. Стопанската комора презентираше посебни марки за екстра и традиционален квалитет. Со ова треба да се зголеми домашното производство, но и да се засили квалитетот, велат од комората.
„Целта со воспоставувањето на овие серификатни марки е промоција на македонските производи и услуги, промоција на македонските компании, поддршка во зголемување на нивната конкурентност и профитабилност, но исто така и промоција на нашата држава во странство. Поттикнување на развојот на домашното производство, неговиот квалитет, креативноста и иновативноста“ – Анета Трајковска, потпретседател на СКМ.
Носител на „македонски екстра квалитет” може да биде само производ изработен од домашни материјали, но мора да е и присутен на пазарот најмалку една година. За „традицонален македонски квалитет”, пак, може да се аплицира само ако производот е добиен со традиционален рецепт.
„Постојат строго утврдени правила и процедури, а во процесот на проверка се вклучени експерти во различни области како што се квалитетот, потеклото, дизајнот, маркетингот, исполнување на одредени стандарди“.
Ваквите марки ќе може да се аплицираат на амбалажата, да се постават на веб страницата на производителот или да се скенираат со посебен QR код. Рокот на траење е три години.
Фото за вовед: YouTube видео: Категорија: БизнисНовинар: Мартин Арсов
