„Ропството е новата лика на слободата во Македонија. Со залагањето на Македонците од власта чекаме Бугарите и Албанците да ја поделат Македонија и да ја врамат сликата на Санстефанија и Шќиперија е Маде. Тоа брзо ќе се оствари, ако Србија ја потпише, или ако обиколно ја прифати велепредавничката „двострана спогодба“.“ – вели Јагнула Куновска во својата колумна со наслов „Кој го враќа Информбирото?“, која ја објави информативниот портал „Плус инфо“.
Покрај другото, Куновска пишува: Туѓите цели на западните камшикари се одамна одомаќинети во Македонија и непречено се реализираат. Со свое видение и наметнати насоки, тие се се изјаснуваат наместо нас за нашите животни прашања. Потоа нѐ оценуваат што сме исполниле, а што не, наводно, како критериум за во ЕУ, без да ги почитуваат нашето достоинство, совест и чест, како и правото на здраворазумниот човек да ја отфрли заканата, која со присила го редефинира неговиот национален идентитет. Ја отфрлам прозападната политика, бидејќи е профашистичка, колонијалистичко-робовладетелска. Здружено нѐ колваат, ни ја третираат државата како тоалетна хартија, а нас Македонците како отпадници од човечкиот род.
Македонија се нареди како држава во таборот на „русофоби“, усогласувајќи ја во таа смисла внатрешната и надворешната политика со Западот, без алтернатива. Затоа, „нашите“ водачи, кои ја препуштија судбината на Македонија во туѓи раце, трчаат да ја „спасуваат“ Украина. Учество во трагикомичен театар е да се штитат интересите на туѓа држава, кога во исто време свесно се врши велепредавство на интересите на сопствената државата. На НАТО и Америка им се брза. И на Англичаните. Како што нетрпеливо нѐ чукаа нас по глава да го потпишеме Охридскиот, да го смениме името со Преспанскиот, а сега да го отвориме Уставот, исто, во тој несреќен за „спогодби“ Охрид, ги присилуваат и Србите да го прифатат француско -германскиот ултиматум, во кој нема две страни, бидејќи Косово е насилно отцепен дел од Србија.
Потоа по брза постапка, државата Косово ќе се обедини со Албанија, со која и сега нема граници и ќе ја официјализира маршутата на Голема Албанија. Не случајно Албанија е местото каде што се градат НАТО базите. Криволак е базата поврзана со Бондстил, каде што се стокми заедничкиот одбранбен систем меѓу Косово и Македонија, кој е големоалбански и е дел од Тиранската платформа. Македонија ја следи судбината на Косово. Не случајно се повлече барањето за албански заедници, бидејќи е преурането. Но, во Прешевската долина синхронизирано се дејствува. Во тоа помага и американската платформа за Отворен Балкан. Сѐ е обмислено со лаги и закани. Тенденцијата е одредени народи, посебно од Балканот, за сметка на други, да ја изгубат својата историска свест.
