Вечерва во реваншот од осминафиналето на Европската лига, Манчестер Јунајтед по пресврт на домашен терен ја победи Барселона со 2:1 и успеа да се пласира во следната рунда од ова натпреварување, додека Каталонците се простија од Европа за оваа сезона.
Манчестер Јунајтед одлично го отвори вечерашниот натпревар и на самиот старт веќе имаше одлична можност кога Бруно Фернандеш излезе сам пред Тер Штеген, но голманот на Барселона успеа да го запре неговиот удар.
После тоа Барселона заигра малку подобро и успеа да го наметне својот ритам, а Каталонците целосно го искористија тоа и успеаја да поведат во 18. минута.
- Спонзор -
Алехандро Балде падна во шеснаесетникот на Јунајтед по дуелот со Фернандеш, а судијата Турпин покажа на белата точка на шок и неверување на домашните навивачи кои веруваа дека не е пенал.
На крајот одговорноста од пенал ја презеде Роберт Левандовски, кој со среќа успеа да го совлада Де Хеа и да донесе водство на Барселона од 1:0.
После тоа, Барселона беше нешто подобра на теренот. Гостите можеа да ја удвојат предноста на крајот од првото полувреме кога Де Хеа направи голема грешка и му ја додаде топката на Серхи Роберто кој се заплетка и не успеа да го искористи тој подарок.
Сепак, Манчестер Јунајтед брзо израмни на почетокот на вториот дел. Во 47. минута домашните одиграа фантастична акција, по која Фред постигна одличен гол за 1:1, а асистенција беше на Фернандеш.
Барселона би можела да дојде до ново водство во 64. минута. По одличен центаршут во шеснаесетникот на Јунајтед, сам остана Кунде, кој одлично упати удар со глава, но Де Хеа мајсторски го одбрани.
Казната за тоа промашување стигна само десет минути подоцна. Фудбалерите на Јунајтед ја искористија збрката во одбраната на Барселона, топката на крајот стигна до резервистот Антони, кој извонредно погоди за 2:1 и големо славје на Олд Трафорд.
Откако прими гол, Барселона тргна во целосна офанзива и се обиде да стигне барем до нерешен резултат кој овој натпревар ќе го одведе во продолжение, но до тоа не дојде.
