Денеска е 5 август (по стар стил) и се слави Светиот маченик Евсигниј. Беше војник кај царот Максимијан, кај царот Константин Велики и кај неговите синови. Присуствуваше на мачењето на светиот маченик Василиск (22 мај) кога виде мноштво Ангели и Самиот Господ Исус како од ангелите ја прима душата на овој Свет маченик. Војуваше за царот Константин и го виде крстот што му се јави на царот. Откако отслужи во војска цели шеесет години, за време на царувањето на Константиновите синови се повлече од воената служба и се насели во Антиохија, која му беше роден град. Овде животот го минуваше богоугодно, во пост, молитва и добри дела. Во времето на Јулијан Отстапник двајца скарани луѓе на улица го зедоа него за судија. Тој му пресуди правда на правиот, заради што кривиот се налути, отиде кај царот и го обвини Евсигниј дека е христијанин. Царот го повика на суд, а тој го разобличи царот за страшното отстапништво од верата и го укори со светлиот пример на великиот Константин. Огорчен, Јулијан нареди и му ја отсекоа главата. Свети Евсигниј пострада и се пресели во Небесното Царство во длабока старост, во 362 година.

Според календарот на МПЦ (Јулијанскиот календар) денеска е 5 август. Денеска е Св. маченик Евсигниј. Овој светител скоро целиот свој живот го помина како војник. Војуваше за време на царевите Максимијан, Константин, а потоа и за време на неговите синови. Откако помина 60 години во војничка служба, се повлече во својот роден град Антиохија. Таму го продолжи својот благочестив живот со сета своја сила. Пострада маченички за време на императорот Јулијан Отстапник, како христијанин. ОД КАТОЛИЧКИОТ КАЛЕНДАР: Денеска е Св. Хелена. Таа била мајка на светиот цар Константин. Откако нејзиниот син и дал слобода на црквата, таа изградила црква во Витлеем каде бил роден Исус и во Маслиновата гора. Во Калварија каде што Исус бил распнат на крст, таа го пронашла Исусовиот крст со кој кога ќе ги допрела болните луѓе тие оздравувале. На света Хелена и се молат верниците за истрајност во верата.

презвитер Ивица ТОДОРОВ Не знам, драги мои, како вие доживувате и разбирате, ама според мене Сонцето заоѓа за сегашново човештво! Од ден во ден злото во сите негови форми и пројави се зголемува, затоа што огромен процент од сегашново човештво го избира! Парите, блудот и суровата пресметлива подлост, во сите форми и пројави, се идолот и богот на нашето време! Секојдневието ни е полно со вампиризирани немилосрдни его-манипуланти кои никако со туѓото не можат да ја исполнат својата празнина! Тука се и пресметливите себеугодливи полтрони кои за својот интерес и комфор и душата ја продаваат! Тука се и збунетите душички кои поради глупавост, наивност и нереалност ги следат и поддржуваат его-манипулантите и полтроните! Во најголем број се душичките со возмутен дух, заболен ум и слепоуличен живот, тие се последицата од претходната гарнитура вампири! Нормални, скоро и да нема, затоа и сонцето заоѓа за сегашново човештво! Некој ќе праша: А каде е Бог, Творецот….? Тој е одамна избркан од овој свет! Го избркаа и се уште го бркаат его-манипулантите, полтроните, озлобените, ситнодушните, збунетите, излажаните, глупавите… Ако, Тој повторно ќе воспостави баланс, така било, така и ќе биде. Жал ми е за наивно добрите, но, Бог е милостив и познавач на нашите срца, мисли и намери….