Заев: Избори пред летото се неопходни, ВМРО-ДПМНЕ: Брзи избори се игра со здравјето на граѓаните

Избори во овој момент се решение, а не проблем. СДСМ ги стартуваше работните средби со кандидадите за пратеници во речиси сите изборни единици. Ставот на партијата е дека изборите пред почекот на летото се неопходни за заживување на економијата, активирање и на Собранието и спроведување на европската агенда, но не по цена на здравјето на граѓаните.

Лидерот на владејачката партија како носител во 4та изборна единица порача дека датумот за изборно соочување ќе се одреди само ако комисјата за заразни болести процени дека постојат услови. Заев и Мицкоски немаат директна комуникација ниту најави за нова лидерска средба, но СДСМ тврди дека се прават напори да се постигне консензус со опозицијата.

„Ни треба целосно функционален демократски институцицонален систем и механизми за развој на стопанството. Ние сакаме избори на кои ќе учествува опозицијата. Имаме силен демократски капацитет и како и досега, ќе направиме се за опозицијата да си ја преземе својата одговорност. Заврши времето кога во тоа време СДСМ дознаваше од телевизија кога ќе се одржат изборите. Се разбира доколку ВМРО-ДПМНЕ одлучи да го кочи овој неопходен демократски процес ние нема да имаме избор освен да ги почитуваме законските рокови за изборниот процес“, порача Заев.

Заев ја става својата тажна политичка кариера пред здравјето на граѓаните, реагираше ВМРО-ДПМНЕ.

Заев и натаму се залага за брзи корона избори на кои наместо да броиме гласови ќе ги броиме новозаразените и починати од корона вирус.

Починатите не се само бројка, тие се наши сограѓани со име и презиме. Не може да бидат решение избори на кои здравјето и животот на граѓаните ќе биде доведено во опасност.

Граѓаните се свесни кои го загрозува нивното здравје, граѓаните се свесни дека власта уште првиот момент на пандемијата со корона вирусот води политика наместо конкретни мерки за заштита на здравјето на граѓаните. Следува казната за ваквото несовесно однесување на Заев и СДСМ, се вели во писменото соопштение на ВМРО-ДПМНЕ.

Фото за вовед: YouTube видео: Категорија: МакедонијаНовинар: Деспина Тодоровска

Related Articles

Leave a Reply

Your email address will not be published. Required fields are marked *