ДОДЕКА ИСТОРИЧАРИ СЕ ПАЗАРАТ СО ИСТОРИЈАТА: Ентузијасти ја донесоа надгробната плоча на Тодор Паница од Виена во Скопје

Додека историчари во македонко-бугарската комисија се пазарат со личности од македонската историја, ентузијасти им ја завршуваат работата која би требало да ја завршат историчарите. Една обична викенд прошетка на виенските гробишта за двајца скопјани, историски ентузијасти се претвора во изненадувачко историско откритие, објави Инфомакс. Скопјаните Петар Кајевски и Дарко Стојанов со малку напор и многу среќа помеѓу 300.000 гробови сосема случајно наидуваат на спомен-плочата на македонскиот револуционер Тодор Паница. Плочата била во лоша состојба и пред отстранување, па тука започнала мисијата да се реставрира што побрзо и да се добијат потребните дозволи за да се пренесе. По 40 години плочата доби нов дом. – Некако случајно го пропуштивме, иако и двајцата имаме зборувано експлицитно да го побараме гробот на Тодор Паница и од негде се појави, од 300.000 гробови наидовме во вистинска секција. Луѓе на виенските гробишта се чудеа како досега не била фрлена плочата. Тоа се спаси летото и пред околу месец дена се решив дека правото место за плочата е во Музејот на Македонија. Беше недела, се договоривме, се поврзавме со Марија Милчин која ја знам лично од Виена и испадна дека е конзерватор на камен, во рок од една недела веќе плочата беше кај мене дома со потребните дозволи за да се извади од гробиштата, вели Петар Кајевски. Текстот на плочата е всушност изгравиран на парче од друг поголем надгробен мермер и тежи околу 8 килограми. Прописите сега налагаат да се изработи копија од истата за гробното место во Виена. – Кога ја гледаме историјата кои улогите на сите луѓе, кој е Паница, кои се неговите противници, сите се тоа приказни на кои има 101 перспектива и погледи, не еден. Тоа што би сакал да го подвлечам, во контекст на она што е вистинско време, е да поттикнам и други луѓе кои се во можност да најдат работи, кои имаат свои приватни колекции, да се потрудат некои од тие работи да ги донесат во институции и, како и да е, да бидат систематски зачувани во Македонија, вели Кајевски. Тодор Паница бил учесник во македонското револуционерно движење, членувал во Македонската револуционерна организација, бил приврзаник на Серската група и е еден од основачите на ВМРО Обединета. Бил застрелан во виенскиот Бургтеатар од Менча Карничева, сопруга на Ванчо Михајлов, по негова нарачка.