Димовски: Законот за Советот на јавни обвинители не е донесен, немаше бадентер

Законот за Советот за јавни обвинители не е донесен, истакна пратеникот од редовите на ВМРО-ДПМНЕ, Илија Димовски и рече дека за законот треба бадентерово мнозинство. Во продолжение интегрално Ви ја пренесува изјавата на пратеникот Илија Димовски. Покрај хаосот и прекршувањето на Деловникот при носење на законот за Јавно обвинителство во овој момент сакаме во име на цела пратеничка група да ве известиме дека и законот за Советот на јавни обвинители не е донесен. Зошто? Уставот на Република Македонија во Амандманот 10 вели дека за закони кои директно ја засегаат културата, употребата на јазиците и така натаму, се употребува бадинтерово мнозинство. Во првиот член од законот за Советот на јавни обвинители, се вели дека со овој закон се регулира и употребата на јазиците. Самиот г-дин Талат Џафери кога најавуваше дека ќе се гласа законот за Советот на јавни обвинители, ве молам вратете ја снимката и погледнете ја, најави дека законот се гласа со апсолутно мнозинство и со Бадинтерово мнозинство. Но, во целиот хаос кој што го направи, тој не го стави на гласање Бадинтеровото гласање заради што овој закон апсолутно треба да се смета како недонесен. Ние го забележавме тој пропуст во текот на седницата, но чекавме да се распушти Собранието и да ја известиме јавноста. Оттука, јасно упатуваме порака, прво до г-динот Талат Џафери, дека потпишување на закон за кој што не е обезбедено мнозинство е спротивно на Уставот на Република Македонија и спротивно на законите. Апелираме до г-динот Пендаровски, покрај за првиот закон и за законот за Советот за јавни обвинители каде што е пропуштено Бадинтеровото гласање иако најавено од страна на г-динот Џафери, да одбие да го потпише. Се спротивно ќе биде длабоко кршење на Уставот на Република Македонија. Затоа во име на пратеничката група на ВМРО-ДПМНЕ можеме да известиме дека г-динот Талат Џафери денеска направи хаос во Собранието на Република Македонија. За жал, крајот на неговото претседателствување тука, како што тој самиот се претставува е катастрофално. Денеска не е донесен ни законот за Јавно обвинителство, ни законот за Советот на јавни обвинители. Попатно едниот без другиот не ни можат да функционираат.

Related Articles

Leave a Reply

Your email address will not be published. Required fields are marked *