Случајно или не, Серхио Агуеро можеби го откри новиот клуб на Лионел Меси иако е непознато дали таму ќе игра идната сезона или некогаш во иднина.
Договорот меѓу најдобриот фудбалер на сите времиња и ПСЖ истекува наскоро, а најава за негово продолжување уште нема, па зборовите на Агуеро имаат огромна тежина. Ако се оствари неговата најава, Меси ќе заигра за Њуелс Олд Бојс во чија академија тренираше пред да се пресели во Барселона.
„Тој сериозно размислува да игра за Њуелс“, рече Агуеро во еден телевизиски разговор, а во муабетот се вклучи Макси Родригес, уште еден поранешен аргентински репрезентативец: „Кун е Кун, едноставно не може да молчи“, додаде тој.
Во моментов, не се многубројни опции кои Меси може да ги разгледува, особено не во европскиот фудбал. Ако замине од ПСЖ, би можел евентуално да заигра во Манчестер Сити или да се врати во Барселона, а интерес за него има од американскиот клуб Интер Мајами чиј газда е Дејвид Бекам.
