Вести
Грчева открива детали од протоколот од кои ќе ви се крене косата: Документот треба да се запали
Солза Грчева смета дека протоколот што треба да биде дел од францускиот предлог треба да се запали и да се фрли.
Лидерката на „Глас за Македонија“ во емисијата „Само вистина“, вели дека власта намерно го крие документот, па затоа таа одлучи да открие детали од тој протокол од кои на јавноста ќе и се крене косата, со намера, и оние граѓани кои се уште седат дома да сфатат за какво чудо од документ станува збор:
„Македонија е должна да ги даде сите свои учебници на Бугарија заедно со методолошкиот пристап како се предава, заедно со работните тетратки, со се! Веќе е договорена промена на учебникот за седмо одделение.
Она што би требало да ги побуни оние кои се сметаат за наследници на комунизмот во Македонија е следниот податок: Македонија се обврзува да ги предаде своите тајни архиви од безбедносните служби од 1945 година до 1991 година, од цивилното и военото разузнавање! Тоа ни во окупација не се случува. Вие на тацна, на туѓа држава да и ги дадеме своите тајни документи.
Понатаму, ќе се санкционира говорот на омраза. Кажете ми што е говор на омраза? Воопшто не е дефинирано што е говор на омраза. Значи ако јас речам дека нешто не ми се бендисува во политиката на Бугарија тоа е веќе говор на омраза. Или ако кажам општа констатација може да биде прогласена за говор на омраза.
Ќе се гонат жртвите од комунизмот. Една Бугарија, која имаше најтврд комунистички режим, кој ние не сме го доживеале никогаш, тие, учениците на Тодор Живков ќе ни држат лекции за нашите жртви на комунизмот. Прашувам- како нашиве не успеаја внатре во документот да вметнат: Ајде да видиме што е со жртвите од фашизмот? За нив не станува збор.
Сите обврски се за Македонија. Нема никаков реципроцитет. Нема ниту една обврска за Бугарија, вели Грчева.
