Детскиот балетски спектакл „Петар Пан“ ја доживеа својата премиера пред домашната публика во Националната опера и балет. Првата претстава беше одиграна во петокот, на 31 март, а поради големиот интерес, вчера беа одиграни уште две претстави.
Дури 57 деца (во двете постави) од балетското студио „Арт балет“ ја пренесоа магијата на Петар Пан, капетанот Кука, Ѕвончица, Венди и останатите ликови од оваа детска приказна на драматургот Џ. М. Бери. Со оглед на тоа што вчера беше Денот на шегата, најмалите посетители ги проследија двете претстави во НОБ облечени во нивните омилени маски.
Зад магичноста на претставата е потпишан тимот составен од Ристо Самарџиев, кој го направи сценариото, Ирена Лозинска, која се погрижи за кореографијата и режијата на претставата, Тамара Ѓурчиновска од балетското студио „Арт Балет“, Елена Вангеловска, која ги создаде костимите, Љупчо Јованов, кој ја осмили сценографијата и Владимир Дојчиновски – Дојчин, кој ја искомпонира музиката.
Според Тамара Ѓурчиновска, подвигот е уште поголем бидејќи 112 деца во две групи, учесници во претставата „Петар Пан“ на возраст од шест до 18 години, со само една сценска проба на големата сцена блеснаа како вистински професионалци на сцената на НОБ.
- Спонзор -
– Во текот на два дена нашите јунаци имаа четири „полетувања“ пред публика од над 2.400 луѓе. За мене, а верувам и за сите што беа дел од овој спектакл, ова беше голема чест и задоволство. Затоа во стилот на Петар Пан на сите деца им порачувам: „Сонувај го животот во бои, во тоа е тајната на ѕвездата среќна. Замисли си дека крилја имаш, рашири ги и вивни се како птица лесна“ – вели Тамара Ѓурчиновска.
