Иако е далеку од европскиот фудбалски крем, Начо Фернандес со години понизно го носи дресот на Реал Мадрид и никогаш не го кренал гласот, незадоволен од својата минутажа.
Секогаш е тука за да помогне, така беше и на мечот против Ливерпул кога влезе во игра на местото на повредениот Алаба и одигра извонреден натпревар. Има 33 години, учествуваше во освојувањето на петте трофеи во Лигата на шампионите и може да стане единствен од оваа блескава генерација кој во својата кариера играл само за Реал Мадрид.
Но неговиот договор истекува на крајот од сезоната, а од Реал нема абер од понуда за продолжување на соработката. Карло Анчелоти, а и дел од фудбалерите во тимот очајно се обидуваат да го натераат Флорентино Перес да го задржи, но на три месеци пред крајот на сезоната, не се гледа такво нешто.
Познат е односот на претседателот кон фудбалерите кои оставиле длабока трага во клубот, не потклекна ни пред Роналдо, ни пред Раул, Касиљас, ни други кои неславно си заминаа од Реал. Начо е далеку од сите овие, но само според името, неговиот труд никогаш не бил доведен во прашање.
