Скопјанец е пренесен во Ургентниот центар на комплексот клиники со повреди од тешка сообраќајна несреќа што се случи вечерва на булеварот Христијан Тодоровски Карпош во Бутел, на семафорите на крстосницата со булеварот Босна и Херцеговина .
Додека стоел на црвено светло во својот автомобил, зад него се појавило возило кое залетано со голема брзина го удрило и целосно го згмечило задниот дел, извртувајќи го за 360 степени.
Очевидци за „Макфакс“ раскажаа дека возачот кој ја предизвикал сообраќајната несреќа возел со неверојатна брзина.
- Спонзор -
„Возеше можеби 200 километри на час“, рече жена која ја посведочи несреќата.
Возачот не успевал да го совлада забрзаното возило по ударот. На крајот удрил во куп песок, дијагонално од местото на несреќата кое е целото покриено со стакла.
МВР ја обезбедува улицата. Се чека увидна екипа.
